Harke laltaẖ, kaṯowo Jan Beṯ-Şawoce këbelan şërto cal kṯowo ẖaṯo d maṯle d nafëq.

H̱abib Be-Čeni, hawi bë qriṯo d Bote. Kowe mi cayle d Be-Čeni. Hawile zawno yarixo cayošo b Hollanda. Ucdo ẖaṯo, nafëqle kṯowo cal folklor d maṯle. B Bote, ar rabe bu cëmro, meqëm mën ëmmiwo? Mën maṯle këtwolle? Zabno yarixo yatëw maltëmile. Hani d aṯën l bole, bi qamayto këṯwile. Hani d laṯën l bole azze mšaylile, më qariwe w më raẖuqe. Bëṯer ẖzele kit b lišone ǧer maṯle qariwe lu mede d miţamërwo b Bote, hani ste mšarkile w hawi kṯowo koxël acle.

Qreli. Yawme yawme, hul caşriye gaẖëxno w fşëẖno cal am maṯle basime dë qreli. H̱a gawo lë kfoyëš acme. Hën cal qarakter d gawre w hën ste cal qarakter d niše, kit ẖubo, ẖile, šira, ẖawruṯo, qariwo w raẖuqo,… bënne. Ma hani qay gëd mëţcoyi? Ma latyo ẖţiṯo?

Hani hawxa ẖa b ẖa rëzile w šërẖile b şurayt d Bote. Ba mëqqa basime w zangane kit bënne, laybi d umarnolxun!… Gëd ubeno kmo maṯle, lašan hatu ste d ẖuzetu, latyo mamro xalyo d kumarno.

1- Kul yawmo b qarce dë ẖḏoḏena…

Hano kowe bayn aṯto w gawro, bayn aẖnone w aẖwoṯo, b gawe d cayle noše cam bala, b gawe dë qriṯo, d gabo, d ẖuḏro, d cito,…

2- Kewo di ẖabo čik baynoṯan

3- Kolëcsina b başre dë ẖḏoḏe

4- Maţyo i skino lu garmo

5- Hul d aḏëcno lruẖi, matëmli u mal d ruẖi

6- U ţacnayḏan yaquro yo

Hani w ǧer mani, hawxa rëzile ẖa b ẖaşe du ẖreno cam šroẖo loxu, lam more… ylafu, hani mënne? Bëṯër hatu ste mawlefunne.

 

H̱abib Be-Čeni: Kafo. Maṯle w Feloṯo me Ţurcabdin w mu cëlmo. Ma aq qamoye mën ëmmiwa? ISBN 978-90-5047-047-6. Bar-Ebroyo Press, 2015 (Hollanda). 299 fëṯoṯo

 

U kṯowo kmizabën b Tigris Press.

 

 

Jan Beṯ-Şawoce